西班牙搵斯洛伐克洩憤

猪拉多纳

3件英超兵怨氣沖天
歐國盃外圍賽C組今晚上演榜首大戰，由西班牙主場迎戰小組一哥嘅斯洛伐克。「鬥牛兵團」依家怨氣沖天，紅魔門神迪基亞轉會皇馬撻Q，梗係要喺國家隊踢爭氣波，2件重返國家隊嘅射手桑馬達同迪亞高哥斯達，喺英超表現備受批評，今場當然想做齣好戲洩憤啦！以西班牙嘅主場威力，要炒起甩皮甩骨嘅斯洛伐克唔難，一於熱捧1.55倍「讓球主勝」。
（有線61、201及中央5台周日凌晨2:45直播）
迪基亞正選岌岌可危
迪保斯基今次點兵，焦點係自巴西世盃後首度入選嘅桑馬達，以及傷愈復出嘅迪亞高哥斯達，2人所屬球會曼聯、車路士上輪英超齊齊輸波，當中開咧後得1球進帳嘅「迪哥」急欲重拾射門鞋，今場有大勇嘅大衞施華、柏度洛迪古斯供應彈藥，定必盡情數胡。
仲有呀，西班牙門將迪基亞今季一直畀曼聯雪藏，點知轉會皇馬美夢破滅，教頭迪保斯基警告佢嘅國家隊位置隨時不保，迪基亞梗係要把握呢次機會證明自己！
斯洛伐克陣容不整
另邊廂嘅斯洛伐克殘陣參戰，利物浦中堅史卡迪爾、AC米蘭中場古卡齊齊坐波監，守將杜歷卡、創造型中場華迪美韋斯傷勢未愈，況且「鬥牛兵團」喺歐國盃外圍賽主場出擊，往往踢高一皮，對上7仗全勝之餘，當中更有5戰贏2球或以上，勁成咁，開出「讓主」話咁易啦。