巴塞上力「-1」省招牌

猪拉多纳

國冠盃尾聲移師歐洲舉行，費倫天拿今晚主場迎戰巴塞隆拿。「地上最強」巴塞三場國冠盃僅一勝，好大程度上因為缺少美斯同尼馬，令進攻侵略性大減；不過隨住連場大戰，球員狀態開始上力，而且費倫實力低過巴塞一大截，有地利都無力阻擋呢支西甲班霸猛攻，捧巴塞隆拿大勝一仗，省番靚金漆招牌，直取讓球客勝。

（有線61及201台周一凌晨3時直播）

巴塞隆拿「MSN」鋒線單靠蘇亞雷斯獨力支撐，整體火力的確比較遜色，但呢位烏拉圭國腳交足功課，三戰有兩球進帳，仍可對費倫天拿構成重大威脅。最重要係巴塞球員已逐漸操起狀態，上仗幾乎可以擊敗車路士，可惜臨尾被逼和2比2，最終互射12碼敗陣。巴塞好少咁失威，連續兩場贏唔到，今仗係時候發力，以免影響新球季士氣。

值得一提，美斯、尼馬已返回巴塞基地接受體測，準備復操，雖然未能趕及今場披甲，但對辛度拉美利斯、蒙尼亞艾哈達迪等副選，應會構成壓力，因為一旦兩位天王復出，佢哋上陣機會勢必大減，更加要把握最後機會表現自己，保住飯碗。
費倫志在試陣有排執

意甲費倫天拿之前兩場國冠盃，先以2比4不敵巴黎聖日耳門，跟住同賓菲加互交白卷，球隊級數同歐洲一線豪門有好大距離。特別係上季有出色表現嘅穆罕默德沙拿已經離隊，有傳射手馬里奧高美斯都可能走人，加上球隊改由保羅蘇沙執教冇耐，恐怕仲要花一段時間觀察球員及試陣，好難同巴塞抗衡。