豪邁墨西哥 8強做阿哥

猪拉多纳

明晨繼續上演美洲金盃8強，重頭戲當然係墨西哥對哥斯達黎加，墨西哥鋒線人腳鼎盛，球隊3場分組賽已轟入10球，卡路士韋拿、奧利比柏拉達都係優秀射手，即使杜斯山度士有傷，仍然夠殺。哥斯達黎加今屆3戰都和波，符碌出線8強，但遇上火力強大嘅墨西哥，睇怕再冇運行，要主勝。（周一早上7時30分開賽，馬會網上文字直播）

墨西哥今屆踢法好豪邁，首仗大炒古巴6比0，之後雖然被危地馬拉死守悶和，但上仗又同千里達全力泡製8個入球，打成4比4，認真誇張。事實上，墨西哥現時陣容「有前冇後」，出色球員集中喺中前場，除咗上述兩位射手，仲有燕豪芬中場古亞達度、波圖中場赫達靴里拉，攻擊點夠多。所以領隊米基爾靴里拉因材施教，盡量發揮球隊長處，就係進攻，相信今場亦唔例外。
哥斯達黎加氣數已盡

至於哥斯達黎加3場分組賽都和波，出到線全因對手更差，當中薩爾瓦多同加拿大只有2分，令哥斯達黎加3分都可以獲得小組次名，認真好彩。不過來到淘汰賽，開始見真章，以哥軍之前嘅表現，實在信唔過。哥斯達黎加兩位喺歐洲搵食嘅前鋒拜仁雷斯同祖爾甘保，都發揮唔出應有水準，後者仲未開齋，令人失望。加上中場大衞根斯文停賽，更加難同墨西哥抗衡，今場輸少當贏。