美國弗爆玩謝洪都拉斯

猪拉多纳

金盃霸主首戰冇甩拖

美洲金盃聽朝拉開戰幔，今屆同加拿大合辦賽事嘅美國將率先亮相，喺A組首輪分組賽火併洪都拉斯。「花旗軍團」自金盃創辦以嚟，每屆首戰從未試過失威唔在講，領隊奇連士文亦將班波調校到最佳狀態，連世界級勁旅德國同荷蘭都未驚過！今場對住洪都拉斯呢個中北美洲「小國」，要開出2.12倍「讓主」打響頭炮容乜易！ （開賽時間：周三早上9:30）
「花旗軍團」頭炮12戰全勝

美洲金盃不嬲美國同墨西哥「玩晒」，過去12屆賽事除咗加拿大試過1次「偷雞」封王，兩隊包攬晒其餘11屆冠軍。其中「花旗軍團」每次頭炮都永冇甩拖，唔單止踢咁多屆贏足咁多場，12戰加埋更勁轟33球，火力絕對夠晒保證。

近5屆金盃有3屆喺首戰斬獲入球嘅丹普西，早前喺美聯盃突然「發波瘟」，怒撕球證筆記簿食紅牌被逐，難得領隊奇連士文唔踢佢出國家隊，反而幫佢講好說話，話今次褫奪丹普西嘅隊長臂章，可以令佢更專注爭取入波，希望佢成為今屆金盃神射手。相信丹普西實搏盡做齣好戲，答謝奇帥支持。

再講，美國為咗備戰今屆美洲金盃，先後約戰上屆世盃季軍荷蘭同盟主德國，雖然兩場都先被對手攻破大門，但最終都反敗為勝。今仗賽前佢哋再搵屬於中北美洲嘅危地馬拉拍跳作終極微調，並輕鬆大勝4:0，表現弗到漏油，今場要贏洪都拉斯兩球易過食菜。
洪都拉斯冇球星得件中甲兵

過去講到洪都拉斯，第一時間實諗起「英超三寶」，但如今柏拉西奧斯同亨特利湯馬士早成國家隊「失蹤人口」，剩低嘅美羅費古羅亞亦開始走下坡。佢哋現時陣中缺少能夠喺歐洲主流聯賽立足嘅國腳，司職防中嘅佐治卡拉洛斯，今年仲淪落到要踢中甲，呢班波戰鬥力有幾高可想而知，想做攔路虎根本有心無力。（金盃A組）