「美女」死火 平手撐德國

猪拉多纳

女子世盃4強重量級大戰上演，美國女足聽朝對德國女足，受讓平半都冇着數。雖然「美女」門將蘇露連續4場保持不失，但射手雅歷絲摩根傷愈後明顯未操起狀態，德國女足勝在火力強撐得過。（中央5台周三早上7:00直播）

「美女」喺8強以1:0淘汰中國女足，表現唔算好對辦。鬼咩，雅歷絲摩根帶傷入選，踢到第3場分組賽至開始打番正選，暫時得1球進帳。35歲嘅雲芭芝仲慘，佢喺分組賽已經試過做後備，對住中國女足又坐冷板，前線冇個靠得住，真係好容易出事。

另邊廂嘅德國女足喺8強以互射12碼淘汰法國女足，贏得好驚險，不過完場前射入扳平12碼嘅隊長莎絲，目前以6球領先射手榜，佢嘅前線拍檔美泰格就有5個士哥，或者佢哋嘅後防唔夠「美女」穩陣，但至少有本錢入到波，2.1倍上盤點都值得睇好。