巴西女足開火轟澳洲

猪拉多纳

女球王瑪達叉足電16強搏殺

在加拿大舉行的女子世界盃，十六強聽日凌晨繼續上演三場賽事，巴西女足率先登場迎戰澳洲女足。森巴兵團分組賽三戰全勝表現出色，加上上仗休息嘅幾名主力今場都會復出，養精蓄銳面對實力唔算太突出，分組賽只係以次名資格出線嘅袋鼠女，有力擊敗對手過關，1.55倍主W屬不二之選。（周一凌晨1時開賽）

巴西女足喺分組賽連贏三場取得首名出線資格，球隊上場雖以1比0小勝哥斯達黎加，但隊長瑪達、中場科美嘉同前鋒姬絲蒂安妮都冇喺嗰場波上陣，明顯留力應付之後嘅淘汰賽賽事。巴西女足嚟到十六強階段應該會再派呢三位主力正選上陣，務求以最強陣容爭勝。至於上仗後備入替建功嘅前鋒拉古爾費南迪絲，相信會繼續扮演後備殺手角色，巴西女足今仗要喺對手身上取得入球絕非難事。

澳洲女足喺分組賽以一勝一和一負取得次名出線資格，陣中擁有隊長兼前鋒迪雲娜，而唯一外流球員効力華盛頓精神女足嘅門將妮迪雅威廉絲，更成功克服傷患連續兩場正選上陣。
森巴女踢大賽食住對手

不過，澳洲女足嘅實力拍埋巴西女足始終有段距離，雙方近年對賽雖互有勝負，但兩軍近三次喺女子世界盃同奧運呢類大賽交手，巴西都能夠順利取勝，阿謙睇好森巴女可以再一次喺大賽擊敗袋鼠兵殺入八強，今仗簡單捧主勝。