哈利仔孭飛英葡大火併

猪拉多纳

英格蘭同葡萄牙呢對冤家又試碰頭，不過今次係一班小國腳之間嘅大戰。喺捷克舉辦嘅U21歐洲國家盃決賽周日前正式開鑼，英格蘭U21今次強陣出擊，最犀利係連英超熱爆射手哈利卡尼都有份，睇嚟英軍真係好想相隔31年後，再次奪得U21歐國盃。呢班「幼獅」喺B組嘅第一關就係面對次熱嘅葡萄牙，雖然英軍球員名氣較大，但葡國實力亦唔可以睇小，今場勝負難料，反而雙方嘅攻力都唔曳，建議改捧大盤。（周五凌晨2時45分開賽）

英格蘭U21係以超強氣勢殺入今次決賽周，喺外圍賽以9勝1和戰績殺入附加賽，跟住再雙殺克羅地亞嚟到決賽周，睇落好堅喎！

主帥修夫基今次更召入多位球星，哈利卡尼、比拉希奴、史東斯等個個都係所屬英超球會嘅正選球員，有實力有經驗。不過，呢班「幼獅」會唔會好似一班大國腳咁，一參加國際大賽就雷聲大、雨點小，咁就真係好難講！始終今場係第一場比賽，對住葡萄牙贏唔到都正常嘅。
葡萄牙貝拿度施華猛料

葡萄牙喺外圍賽成績更犀利，以10連勝姿態嚟到決賽周，當中有9場係入到兩球或以上，攻力一啲都唔曳。葡軍陣中有位明日之星貝拿度施華，呢位中場通天佬倌上年由賓菲加借去法甲球隊摩納哥，因為表現勁sharp醒，摩納哥竟然喺今年1月豪擲1500萬歐元（約1.3億港元）買斷佢。用成億幾去買一個只得廿歲嘅「(口靚)仔」，咪以為摩納哥多錢得滯，貝拿度施華真係交到貨，佢喺剛過去嘅法甲交出9入波3助攻嘅成績。葡軍中場有佢做串連，一對箭頭列卡度彭利拿、艾雲卡華利路要入波即刻輕鬆好多。既然兩軍前線都有潛質新星孭飛，今場一於博大喇！