法國女足唔赦獅子乸

猪拉多纳

坐擁半個主場

女子世界盃今晚有好戲碼，F組雙巨頭法國同英格蘭會喺分組賽正面交鋒。有「女版施丹」妮絲比壓陣嘅法國近年食住英格蘭，況且唔少「三獅」女將都係啱啱傷愈未操起狀態，法國1.5倍主W值得投以信心一票。

（中央5台周三凌晨1:00直播）

雙方喺外圍賽都係遇神殺神，同樣係10戰全勝並合計喪入106球，不過呢場硬仗亨格比利就秤先法國少少，畢竟今場波嘅舉行地蒙克頓係一個主講法語嘅城市，預期起碼有1.4萬名講法文嘅球迷入場撐法國，同聲同聲，淨係份氣勢都夠晒勁。
女版施丹坐鎮

法國嘅28歲中場妮絲比創造力同腳法一流，有「女版施丹」之稱，有佢餵波畀雙箭頭芬妮同戴莉，呢個三叉戟真係唔講得笑！再講吖，法國兩年前喺歐國盃分組賽以3:0輕鬆踢英格蘭出局，舊年又喺塞浦路斯盃決賽砌低「三獅兵」，擺到明剋住英格蘭。
英格蘭半隊傷兵

唔係話英格蘭唔掂，不過領隊麥克森遜上月公布大軍名單嗰陣，足足有9名球員係養緊傷或者啱啱傷愈，6個前鋒入面東尼杜根、佐迪泰萊同艾倫韋芝都係最近先克服膝傷；守將邦絲、門將嘉蘭芭絲莉亦養傷缺席咗今季大部分聯賽，雖然呢堆傷兵上星期已經復出，喺世盃前最後一場熱身賽鬥加拿大場波披甲，但英格蘭最後都係輸0:1收場，明顯仲未操番起狀態，今場波憑咩同法國鍊呀？