瀛女超班瑞士交學費

猪拉多纳

明早加拿大女子世界盃戲碼強勁，上屆冠亞軍日本、美國分途出擊！C組身負衞冕重任嘅日本女足，保留澤穗希、大野忍、宮間綾、大儀見優季等捧盃功臣，技術、默契、經驗都係首屈一指，今仗對手僅為首次進身決賽周嘅瑞士女足，難對「東洋魔女」構成威脅，直取日本女足讓球主勝。

（周二早上10時開賽）

日本女足自五年前獲得亞運金牌起進入盛世，更於2011年爆冷勇奪世盃冠軍、2012年奧運銀牌，上年捧亞洲盃冠軍。「東洋魔女」今屆大軍名單亦有多位球員曾參與上屆世盃，包括該屆神射手現年36歲嘅澤穗希，加上効力拜仁女足嘅22歲前鋒岩淵真奈近年大熟大勇，日本攻力毋須懷疑。

瑞士女足今屆先至首次打入世盃決賽周，經驗已經輸一大截，特別係第一場比賽，隨時怯場之下出現甩漏，今仗難免先要交吓「學費」。
美國女足炒起澳洲

至於D組美國女足對澳洲女足，「美女」六屆世盃取得兩冠一亞三季，上屆僅因互射12碼不敵日本。美國今屆亦保留多位名將，包括門將蘇露、前鋒雅歷絲摩根，以及國際賽入近200球嘅雲芭芝，今仗炒得起澳洲女足，要讓球主勝。

（周二早上7時30分開賽）