女子世盃開幕 加拿大中國夾計做細

猪拉多纳

2015年女子世盃聽朝開幕，東道主加拿大女足迎戰中國女足，玩1.68倍入球細最實際，畢竟加拿大女足平均年齡偏大，對住比較後生嘅中國女足，未必輕易入到波，加上中國女足有食胡射手楊麗缺陣，好難旨意佢哋開入球騷。

（開賽時間：周日早上6:00）

加拿大女足喺2012年倫敦奧運足球賽得季軍，的確幾叻女，但佢哋嘅陣容已開始老化，作為隊長嘅射手姬絲甸冼佳亞，下星期就年滿32歲，而且佢有幾個隊友都係3字頭，要求加拿大女足搏足全場，似乎都幾難，揭幕戰驚輸更加未必會搶攻。
馬曉旭落選 楊麗養傷

中國女足上年喺女子亞洲盃得季軍，但由於昔日主力馬曉旭冇態被棄用，女子亞洲盃神射手楊麗又因為受傷唔能夠歸隊，教頭郝偉明顯灰晒，坦言首要目標只係爭分組賽出線，暗示球迷唔好有太大期望，試問咁嘅情況，你會唔會覺得中國女足入到好多波？