巴塞巨星超斑衝3冠

猪拉多纳

意甲冠軍祖雲達斯同西甲巴塞隆拿已經進駐德國柏林，今晚歐聯終極戰爭做2015歐洲王者！兩隊都係聯賽同盃賽嘅「雙冠王」，今場邊隊捧盃就會係「三料冠軍」。雖然大家都係班霸，不過今場關鍵，好可能係由巨星建奇功，呢方面巴塞就有「MSN」三個可以扭轉乾坤嘅「天王」，梗係撐佢哋贏波捧盃啦！（有線61、64、201及203、中央5台周日凌晨2:45直播）

巴塞同祖記今次同樣係第8次殺入歐聯決賽，「地上最強」攞過4次冠軍，祖記就只贏過2次，「斑馬兵團」對上一次入決賽已經係03年，相比之下，巴塞最近嗰次捧盃就係11年，計球員嘅大賽經驗，「地上最強」真係贏足9條街！
MSN近14戰喪入37球

今場大戰話題性十足，淨係蘇亞雷斯同祖記兩大守將基亞連尼及艾拉嘅「牙齒印」，就已經好有娛樂性。可惜基亞連尼喺操練受傷，肯定踢唔到呢場決賽，無緣引「哨牙蘇」再咬佢一啖。

不過唔好忘記，「哨牙蘇」只係巴塞鋒線上嘅「3哥」，美斯同尼馬先至係「大佬」同「二佬」，依家世界上都好難有一條防線頂得住佢哋！對上一次「MSN」無波入，已經差唔多成兩個月前，近14戰呢個「南美三叉戟」總共入咗37球！仲有，巴塞老臣子沙維同丹尼爾，踢埋今場就會離隊，咁梗係搏命攞番隻盃、好嚟好去啦！
祖記3老加埋107歲

對家祖雲達斯殺入決賽靠嘅係一條防線，三大老將保方、巴沙利同派路喺「2006世界盃」，就係喺柏林呢個球場幫意大利國家隊贏冠軍。只可惜，佢哋3位加埋已經成107歲，原來祖記個正選陣容，係歐聯決賽史上第三老！今場對住活力十足嘅巴塞攻擊線，要令「MSN」90分鐘內「冇飯開」，真係難過登天囉！
頂占筍盤：巴塞隆拿（客勝）

Data King：斑馬軍歐聯二奶命

‧巴塞7次殺入決賽有4次捧盃。

‧祖記7次入決賽僅得2次封王。

‧祖記以往對西班牙球隊得15勝11和18負。
乜都玩錦囊：巴塞歎慢板博半場細

形勢上祖記對住巴塞多數死守，上半場應該冇咁快失守，何況巴塞近期鍾意歎慢板，對上6戰有4仗開半場細，先後試過同拜仁、皇蘇同馬體會半場踢成0:0，1.4倍半場細有得諗。
盤路解碼：巴塞歐戰鬥意大利球隊成績為22勝13和8負。