西維爾地震 讓唔起費倫

猪拉多纳

歐霸4強 意氣風發

今晚爆發歐霸四強首回合，上屆盟主西維爾先喺主場迎戰費倫天拿。西維爾啱啱畀皇馬打破今季主場不敗金身，大戰前夕更傳出主帥艾美利被撬消息，勢必影響軍心，點咬得入盃賽作客特醒嘅費倫天拿呀？西維爾仲要讓到半一咁多，斯維力撐「紫百合」下盤。

（有線61、64、201及203台周五凌晨3時05分直播）

查實西甲「五哥」西維爾今季表現唔錯，尤其喺主場特別Sharp醒，連盃賽一度保持廿六場未輸過，強如「地上最強」巴塞嚟到比斯祖安球場都要失分而回，都咪話唔堅；可惜日前聯賽喺自己地頭以2比3不敵皇馬，唔單止近十五場不敗走勢畫上句號，嚴重打擊爭前四嘅來屆歐聯入場券，連主場不敗金身都保唔住，對士氣點都有影響。最弊係即將有大水喉入主嘅AC米蘭，傳出睇中西維爾教頭艾美利，下季接替冇料到嘅恩沙基掌舵，而且爆出只需畀100萬歐元就可為艾帥「贖身」，臨近大戰費倫先嚟咁多不利消息，此乃兵家大忌，眾將未必能集中精神應付比賽。
紫百合盃賽作客未輸過

意甲「五哥」費倫天拿早已疊埋心水爭盃賽，雖然喺意大利盃四強遭祖雲達斯踢出局，反令佢哋可集中火力於歐霸上。費倫教練「飛機仔」蒙迪拿一向多計，又擅於激勵球員鬥心，好似冬窗從車仔借來嘅「埃及美斯」穆罕默德沙拿，就喺「飛機仔」手下大爆發，呢位翼鋒唔想返車仔「吽臭」，必定拚盡博其他豪門垂青。加上費倫喺今季盃賽作客非常厲害，錄得六勝兩和未嘗一敗，不但擊敗祖雲達斯同兩挫羅馬，更逼和熱刺絕對唔嘢小，今仗仲受讓半一咁筍，呢個下盤咪走寶。