般尼茅夫英雄夠雷氣

猪拉多纳

英冠又開快車，雷丁今晚喺主場對般尼茅夫，輸波機會好大。點解？因為雷丁跟手要喺英格蘭足總盃4強挑戰阿仙奴，如無意外會收起部分主力，加上般尼茅夫領隊艾迪荷維為球會効力多年，終於苦盡甘來贏到掌聲，撐佢繼續威正路喎！

（開賽時間：周三凌晨3:00）
雷丁留力英總4強

雷丁日前喺主場以0:0打和布力般流浪，狀態依然唔掂。冇錯，現時雷丁形勢上仲要搶分護級，但緊接對阿仙奴嘅英總大戰，對佢哋嚟講肯定大過天，而且雷丁陣中已經有大批傷兵，再承受唔起有球員受傷，所以大家最熟悉嘅射手普格恩耶克同西蒙確斯，睇怕都唔會同時打正選。

般尼茅夫今季大翻身，日前作客以2:0打沉白禮頓，更加繼續以1分騎住諾域治，保住榜首位置。要數般尼茅夫英雄，當然係37歲教頭艾迪荷維啦，佢之前當選英冠3月份最佳領隊，喺球員時代3度為般尼茅夫効力，教練生涯都先後2次答應出任般尼茅夫教頭，對球會不離不棄，淨係呢份忠誠，都值得撐佢贏波啦！