皇馬遇鐵桶吼和客

猪拉多纳

華歷簡奴頂得兩嘴

今個周中西甲加開快車，榜首雙雄巴塞同皇馬今晚分途出擊，皇馬王牌C朗上仗發威嚟個「五福臨門」，志切要爬過名宿迪史堤芬奴頭，榮升「銀河艦隊」2號射手，但今仗作客對近況唔曳嘅華歷簡奴，絕對唔易食，不妨敲有3.9倍分頭嘅和客。

（now 632周四凌晨4時直播）
C朗爭9粒做皇馬No.2

C朗上仗大勝CF格蘭納達9比1之役連轟5球，令佢喺皇馬累積入球數字達到299球，只要多入9粒就可超越迪史堤芬奴（307球）成為「銀河艦隊」史上次席射手，《馬卡報》更力撐C朗喺今季完結前搞掂添。雖然C朗一吐早排國家打吡輸波嘅悶氣，用瘋狂入波證明自己，不過今仗對手華歷簡奴並非善男信女，佢哋主場出擊已經四連勝，況且皇馬上仗鋒芒過露，華歷簡奴一定會加強防守，皇馬初段未必咬得入，就算全取3分都會贏得好辛苦，度士建議捧3.9倍嘅和客。
巴塞半場玩「大」佢

至於較早時間開波嘅一哥巴塞則喺主場迎戰弱旅艾美利亞，同死敵皇馬相反，巴塞上仗作客險勝切爾達1粒，成班波踢到「立」晒油備受批評，但你唔好理，佢哋已經連贏8場，弗到勒唔住。尾三嘅艾美利亞啱啱炒咗教頭桑馬天尼斯，搵咗前巴塞名將沙治接手，但佢執教經驗唔多，匆匆上任未必幫到隊波，隨時衰多兩錢重。

巴塞依家只領先皇馬4分，仲有9場波要踢，個聯賽冠軍唔係坐定粒六，況且上仗啞火嘅「MSN」美斯、蘇亞雷斯同尼馬，甚少連續兩場冇貨交，預計佢哋一開波就嚟料，初段快刀斬亂麻入多幾粒鎖定勝局，讓球主客和巴塞要讓到3球太辣，度士認為半場大有1.55倍更加穩陣。

（now 632周四凌晨2時直播）