法國玩輪換 丹麥博偷雞

猪拉多纳

身處歐國盃外圍賽I組嘅丹麥今周輪空，按照賽會安排將和主辦國法國進行熱身賽。「中堅賓」賓特拿上場連中三元，協助丹麥反勝美國3比2，面對剛和巴西激戰完畢、有可能大幅換輪嘅法國未驚過，捧讓球客勝。

（有線64及203台周一凌晨2時45分直播）

兩軍上周中均踢完國際賽，先不論勝負，法國面對五屆世界冠軍兼宿敵巴西，所消耗體力肯定比對美國嘅丹麥較大，而且法國又比丹麥少一日休息，主場出戰都冇太大甜頭。

況且，法國上場強陣出擊輸1比3，賓施馬、基沙文、華布拿、華拉尼等主力全部踢咗至少70分鐘，為免踢殘班球員，領隊迪甘斯今仗或會改派一些上場冇份上陣嘅副選落場，包括首次入選嘅車路士中堅葛特蘇馬、依家喺法甲射手榜領先嘅拿卡錫迪，默契上恐會打折扣。而且從上仗所見，法國隊冇咗受傷缺陣嘅保羅普巴，中場攻守亦冇以往咁流暢，遇上踢法機動嘅丹麥隨時有麻煩。
賓特拿剛戴帽弗爆

丹麥今次點兵冇選中堅丹尼爾艾格及老牌左中場卡倫保，其餘主力包括前鋒賓特拿、熱刺中場基斯甸艾歷臣、阿積士中場舒奧尼及中堅卡積亞俱在陣，當中賓特拿上仗對美國大演帽子戲法，盡顯功架，進攻大腦基斯甸艾歷臣亦只係踢咗半場，只要發揮水準，有力和主隊一戰。讓球主客和法國讓一球，波童捧讓球客勝。