小保加超班「聖」券在握

猪拉多纳

阿甲 8:30 （日）61 聖馬田聖祖安 Vs 小保加

阿甲小保加聽朝會作客聖馬田聖祖安，憑超班實力讓波冇問題，捧3.05倍「讓球客勝」啱數。「聖馬田」喺今季阿甲踢咗5輪贏得1場，更大鑊嘅係首席射手般諾淨係識作客入波，開咧後兩戰主場對手係甘拿斯亞、小阿根廷人呢啲實力一般般嘅球隊就話頂得住啫，想喺班霸小保加身上搶分難過登天！

小保加雖然要喺阿甲同自由盃雙線作戰，幸好戰績仍然堅挺，踢咗9場取得8勝1和未輸過。近兩場披甲斬獲3球嘅奧斯華度，日前自由盃被教練收起留力今場波，而有份落場嘅桑馬天尼斯、哥拉素即趁機騷哥利，各自梅開二度協助小保加大勝。既然小保加班攻擊球員撻着晒，入波易過食菜，今場要炒起「聖馬田」話咁易啦！