7月會師新加坡

猪拉多纳

阿仙奴愛華頓史篤城

自從2003年，Peter與英國殿堂級評述員馬田泰萊成為好友之後，通常會喺逢單數年夏天舉行嘅巴克萊英超亞洲挑戰盃相遇，今年因為要帶團到英國睇波，所以早了一點兒，啱啱先同馬田泰萊喺唐人街中國餐館飲茶，其虛心、專業態度及不慍不火嘅評述方式，都令Peter獲益良多。
今晚睇埋韋斯咸鬥「車」

除咗敍舊之外，當然有特別消息爆畀東方讀者們喇，嚟緊7月中嘅巴克萊英超亞洲挑戰盃將會在新加坡舉行，到時東來嘅英超球隊，極有可能係阿仙奴、愛華頓同史篤城，連同星洲嘅冠軍隊一決高下，如果本港球迷想一睹球星風采，不妨早啲訂機票及叫當地朋友幫你買波飛喇。

至於英倫睇波團最後一站，Peter今晚會去到倫敦嘅烏普頓公園球場，欣賞英超韋斯咸主場硬撼車路士，車仔近期行緊好運，唔單止啱啱奪得聯賽盃，乘住勁敵曼城周日聯賽輸畀利物浦，依家續領先「藍月亮」5分兼打少場。不過，有時某啲球隊喺聯賽嘅表現，唔及盃賽生死戰咁集中精神，車仔捧完盃冇耐心態難測，若果要投X嘅話，建議試吓1比1同車仔贏2比1嘅波膽喇。

（now 621周四凌晨3時45分直播）
金句：君子之交淡如水兩年一會情義深