侯城老虎恰病貓

猪拉多纳

新特蘭5仗不勝黑氣纏身

本周英超加開快車，今晚率先上演三場，其中護級大戰「老虎」侯城主場迎戰「黑貓」新特蘭值得留意。新特蘭後衞布朗上仗因球證「點錯相」被逐，真係黑仔到暈！侯城最鍾意返自己地頭先搵食，撞正呢隻黑到痹嘅「黑貓」仲唔開餐咩？「老虎」主勝咪錯過。

（now 623周三凌晨3時45分直播）

英超球證嘅水準一向備受質疑，日前新特蘭作客曼聯，明明係黑貓中堅奧沙於禁區將曼聯球星法卡奧拉跌，球證伊亞斯特卻點錯相，將喺隔籬做夾擊嘅另一新特蘭後衞布朗「直紅」趕出場。雖然兩人曾効力過曼聯，但無論個樣定膚色都好大分別，布朗硬食呢隻「死貓」都咪話唔應呀；新特蘭已極力為布朗上訴，不過相信點都趕唔切於今仗披甲。踢波嘅嘢有時唔到你唔信邪，球證伊亞斯特咁都搞得錯，證明新特蘭正值當黑，加上「黑貓」近五場未贏過兼只係入得一粒咁大把，睇嚟呢班波黑氣未除喎！
布魯士食腦主場先搏殺

其實聯賽排第十五嘅侯城，只係比新特蘭高一位及多一分，呢場絕對係正宗護級「六分波」；「老虎」上周六聯賽不敵史篤城，美羅費古羅亞更使出「收山腳」剷到史軍中場艾利蘭留咗條3吋長嘅血痕，但球證發雞盲睇唔到又冇畀牌，美羅費古羅亞嘅好運與黑仔布朗簡直係天同地比。況且侯城經過一輪低潮後，主帥布魯士亦諗通咗無謂場場硬碰，作客但求盡力而為，寧願集中火力返主場同護級勁敵死過。

之前侯城兩場勝仗均喺自己地頭擊退昆士柏流浪及阿士東維拉，相信唔係咁蹺，今遇黑到冇朋友嘅「黑貓」送上門，呢隻餓到慌嘅「老虎」仲唔起勢咁噬咩，主勝有1.98倍捧得過。