床單王子大戰巴塞

猪拉多纳

西盃8強首回合
回巢重生強勢襲魯營

聽朝西班牙盃8強首回合上演重量級戲碼，巴塞隆拿會喺魯營球場迎戰馬德里體育會。「床單王子」費蘭度托利斯重返母會後表現翻生之餘，更同基沙文極速建立默契，今晚造訪魯營，遇上美斯、蘇亞雷斯同尼馬嘅巴塞「MSN」鋒線，兩大進攻組合碰頭，一於捧1.8倍「大」，擔定櫈仔睇入球騷喇！

（now632台周四清晨5:00直播）
美斯撻番着 巴塞4戰勁入16球

巴塞喺新年首戰不敵皇蘇後，雖然爆出大堆負面新聞，但王牌美斯一於少理，以實際行動做回應，先係西盃16強首回合鬥艾爾切，夥拍蘇亞雷斯同尼馬齊齊攻破對方大門，跟住西甲以3:1擊敗馬體會，並完成「MSN入波二連擊」。之後失落金球獎嘅美斯，日前聯賽再搵拉科魯尼亞做出氣袋，連中三元協助巴塞做出4連勝、勁轟16球佳績，今場「MSN」再喺魯營聯手出擊，入波易過食菜啦！

嗰邊廂巴塞擁有無堅不摧嘅「MSN」，呢邊廂「床單兵團」馬體會嘅「GF配」亦不容忽視！基沙文（Griezmann）今季由皇蘇過檔後相當對辦，至今各項賽事攻入11球。最重要係呢名法國翼鋒同費托（Fernando Torres）明明夾咗冇耐，不過默契度就爆晒燈。
費托勁夾基沙文 訓練場積雪冇波練

點解咁講？事關「王子」上圈西盃作客兩度攻破皇馬大門，射術固然夠功架，不過兩球妙到毫巔嘅傳送，都係由基沙文餵畀費托，睇得出佢哋已經擦出火花。即使馬體會訓練場由於嚴重積雪，令到星期一全日操練被迫取消，但呢對「GF配」又弗又夾，操少課都唔難喺魯營搵到作客入球啫！
Data King：交手勁旺入球雙

‧雙方近7次對決開出6次「入球雙」。

‧巴塞隆拿近6戰主場開出5次「半場大」。

‧巴塞王牌美斯連續6戰主場有斬獲，勁轟11球。
乜都玩錦囊：信往績博馬體會先入波

巴塞同馬體會射手大鬥法，今場入球大固然值博，如果想再好分頭啲嘅話，不妨吼實馬體會「第一隊入球」。兩隊近年喺歐聯同西超盃4度碰頭，撇除其中一場打和0:0，其餘3場馬體會都率先攻破巴塞大門，今場馬體會入波先有成3.4倍，抵博吖！
盤路解碼：巴塞喺魯營球場慣做大騷，今季15戰開出12場大，比率高達8成。