澳洲地頭「讓主」攞威

猪拉多纳

亞洲盃今日開打

亞洲盃今日正式揭開戰幔，東道主澳洲會領銜揭幕戰，喺A組迎戰科威特。「袋鼠兵團」對於賽事喺家鄉舉行極為重視，領隊普斯迪高路徵召大批外流兵之餘，中場悍將比斯安奴更揚言捧盃「有今生冇來世」，首戰鬥同組最弱嘅科威特，勢必盡數打響頭炮，1.95倍「讓主」係不二之選。

（now672台周五下午5:00直播）

澳洲今鋪可謂精銳盡出，喺歐洲聯賽搵食嘅積甸拿克、羅比古斯、湯馬士奧亞等猛將悉數歸隊，連同踢緊澳職嘅中後場主將米利根同史柏拉洛域，個個都有參加亞洲盃嘅經驗，唔使驚佢哋怯場。至於考慮喺亞洲盃後退役嘅比斯安奴，賽前更揚言喺家鄉捧亞洲盃嘅機會難逢，相信隊友都會搏到盡爭勝，為呢名副隊長留個美好回憶。
連續兩屆輸畀日本

雖然睇近績嘅話，「袋鼠兵團」近11場僅得1勝2和8負，但8場敗仗全部作客出戰，當中包括喺世盃令智利同荷蘭兩大勁旅吃盡苦頭。而且「袋鼠兵團」喺06年由大洋洲跳入亞洲後，曾經兩度出征亞洲盃，由首次參戰8強止步，再到上屆決賽飲恨，兩仗都係輸畀亞洲強國日本，其餘對手根本難對佢哋構成威脅。

對手由世界勁旅變成亞洲魚腩，澳洲都預咗科威特踢法會偏向保守，專心打防守反擊，喺德國搵食嘅箭頭馬菲歷基就自爆，佢哋集訓期間花咗唔少時間鑽研破密集嘅戰術，今場佢拍住卡希爾同羅比古斯組成「三叉戟」喺前線搵食，要撕破科威特防線易過借火啦！
科威特賽前陣都冇試

另邊廂，科威特中堅艾伊巴謙賽前都講咗兩句，話好敬重澳洲國腳卡希爾，但就驚都未驚過，有信心封到對方一戙都冇喎。但筆者就覺得佢講得出未必做得到喇，事關科威特喺1980年以主辦國身份奪得亞洲盃後，無復當年勇，最近3屆有2屆喺分組賽拜拜，剩番嗰屆更係外圍賽止步。

最弊係科威特早排喺海灣盃踢得曳，搞到主帥韋亞拿落鑊，新帥馬亞路爾接手只得短短一個月，喺出戰今場之前，原本約戰阿聯酋拍跳作最後備戰，點知佢哋就拍攝比賽片段問題傾唔掂數，最後取消咗場比賽，連唯一試陣機會都冇埋，今場點同矢志捧盃嘅澳洲撼呀！
亞洲盃A組