亞洲盃前哨戰！日本澳洲試陣細均力敵

猪拉多纳

「亞洲盃」今日提前開打！講笑啫，但係今晚日本响大阪長居陸上競技場迎戰澳洲，真係出年1月亞洲盃決賽周嘅前哨戰，因為「藍武士」公認係奪標大熱，澳洲就係主辦國，大家都係爭霸分子，今場為面子而戰唔衰得，開1.9倍入球細真係唔奇。

（有線61、201周二晚6:20直播）

仲有兩個月左右，亞洲盃就會喺澳洲爆發，所有決賽周分子都分頭熱身，日本更加將友賽「袋鼠兵團」呢場波，視為2014年最重頭嘅備戰環節。由於日本換咗艾古爾揸旗冇耐，仲喺度試陣試人，澳洲就處於新老交替期，所以呢輪嘅備戰重點，都係心理輔導，戰術融合居多，情況非常類似。

先講日本，艾古爾上任之後提拔咗啲新人，打法上依然沿用4-3-3攻擊陣式，但係輸畀巴西、烏拉圭兩場波後，令佢不得不正視攻守平衡嘅問題，賽前就傳出佢想轉踢4-4-2，仲可能用武藤嘉紀、森岡亮太打兩邊中場，收埋本田圭佑、香川真司唔畀澳洲捉路，傷兵內田篤人個左閘位，多數由太田宏介頂替，個陣變化咁大，好難保證會有水準演出。

澳洲都响度試陣，原因係班國腳老嘅老，嫩嘅嫩，好似卡希爾下個月已經35歲咯，出現咗一個斷層，教練普斯迪高路想咗個辦法拉近兩代球員嘅思維，就係翻睇97年世盃澳洲响Lead住兩球畀伊朗逼和，最後冇得出線嗰場波嘅錄影，希望用恥辱將全隊人凝聚埋一齊。由於澳洲講明靠戰意掛帥，日本亦都唔想主場跪低，香川真司直情呼籲隊友要學網球王子錦織圭嗰種鬥心，雙方試緊陣都照搏，好可能得個亂字，入球細有得諗。