南韓女足搵越南出氣

猪拉多纳

亞運女足季軍戰由東道主南韓惡鬥越南，南韓女足上仗如非完場前犯錯被對手射入致勝球，同北韓女足究竟鹿死誰手仍屬未知數，南韓女足今仗季軍戰自然希望踢番場好波答謝球迷支持。至於越南女足上仗慘吞日本女足三蛋盡顯實力上嘅差距，今仗面對實力唔弱嘅東道主相信難有作為，阿謙睇好南韓女足可以輕取摘銅。

（有線61及201台周三下午4時直播）

南韓女足上仗面對北韓女足，喺外界一致睇淡嘅情況下有優異演出，更憑鄭薛斌先開紀錄領先，雖然及後被北韓嘅李藝景追平，但雙方其後皆有置對方於死地嘅埋門，可惜皆未能轉化成入球。眼看呢場南北韓大戰要進入加時階段，南韓後防卻於補時因球員回傳乏力，導致北韓嘅許恩別射入致勝球贏波過關。南韓女足喺呢場波嘅表現其實好好，可惜最後功虧一簣，相信球員現階段應會收拾心情準備好踢季軍戰，務求踢番場好波答謝球迷支持。
實力有距 凶多吉少

越南女足上仗面對日本女足，只係輸0比3可以話係演出「超水準」。不過，越南女足分組賽曾以0比5慘敗於北韓女足腳下，今次遇上南韓女足，雙方實力應有一段距離；再加上東道主喺主場球迷嘅吶喊助威下，氣勢已經贏一大截，今戰越南女足都係凶多吉少，就算南韓女足讓球主客和讓到三球都冇有怕。