布加勒斯特星隊 上盤穩陣

猪拉多纳

新一季英超開鑼後，投X市場火爆，畢竟英超知名度高，周圍都有得睇，加上球迷餓波已久，故出手都幾重，大部分資金追捧對名牌球隊。莊家開盤亦好辣，強隊讓得多，結果首輪英超10場波出現8場下盤，搞到大戶損手。歐聯附加賽今晚開打，強隊開始蒲頭，相信又會掀起另一個高潮。肥叔今次推介布加勒斯特星隊主場對盧多格德斯，星隊讓平半，要上盤。

（有線63台周三凌晨2時45分直播）

東歐以往係假波溫床，過去揭發嘅假波案唔少都涉及東歐球隊，部分更係歐洲賽。因此當局特別留意東歐球隊表現，想再造假並唔容易。來自羅馬尼亞嘅布加勒斯特星隊始終都係前歐洲冠軍，有信心保證，佢哋上屆歐聯分組賽主場表現不俗，曾打和德甲史浩克04，絕對唔失禮。

保加利亞球隊盧多格德斯屬於歐聯稀客，想喺呢項高水準賽事突圍相當困難，首回合作客應會傾向保守，前景唔樂觀。
兵工廠作客土耳其惡踢

另外，阿仙奴作客比錫達斯唔易踢，土耳其球隊主場一向好惡，當地球壇近年投入大量金錢招攬球星同名帥加盟，提升整體水準，兵工廠要讓半一，寧揀比錫達斯下盤。至於意甲球隊喺歐洲賽演出愈來愈曳，拿玻里主場讓唔起畢爾包半一。