魚躍鳥飛 磅輕檔靚

猪拉多纳

終於跑到最後一次賽事，睇咗幾十年馬，騎到識飛嘅，咪又係人一個。唔係阿棟麻木，而係想同大家講，切忌因為煞科，係又買，唔係又買，記住平常心面對，勝不驕，敗不餒。

第五場四班1400米。「紫電明珠」跑1200米成日唔出頭，轉往呢項路程發展，命運都係冇變，阿威已經做足本分，奈何隻馬質素可能係咁上下，逼都逼唔嚟。當然，連場上名賽績亦可視為逢出必拼，話唔定跑到今場會精誠所至，金石為開。

第七場三班1200米。「得天獨厚」二月跑到流鼻血，六月復出跑兩場，前一場跑到甩皮甩骨，上次即刻有起色，證明狀態漸漸復甦。跑完大摩專登唔放佢暑假住，係都要跑埋今場，唔係有心出擊，對一匹流完鼻血冇耐嘅馬，使唔使逼得咁緊先？

第十一場一班1600米。「魚躍鳥飛」三班連場上名，升至二班一攻即中，呢隻自購馬確係潛藏豐厚，下季進一步成熟，可能會幹出成就。今次趁勇在一班試吓腳，雖然唔係冇對手，但佢有兩大優點，恃住輕磅走先，同埋，好位易攞欄，最終夠唔夠呢棚馬鬥唔敢包，肯砌位置應該唔難攞。陳華棟