小方爭冠準備就緒

猪拉多纳

繼上季葉、東兩廐鬥到最後一日之後，今季輪到蔡約翰同方嘉柏埋身肉搏。落後1W嘅小方傾巢而出，加上有最佳拍檔出爐冠軍騎師潘頓助拳，實行全力反撲，登上寶座可以話「準備就緒」！
       

跑咗成十個月馬，卒之都嚟到煞科日，繼上季葉、東埋身肉搏爭奪冠軍練馬師寶座之後，今季輪到蔡約翰同方嘉柏短兵相接。事實上，小方依家落後唔多，只要喺煞科日比神仙蔡多取1冠2亞，就已經有機會以較多嘅季軍次數後來居上，嚟個奇迹反勝唔係冇可能。
       

早幾日報名表一出，唔少朋友都話蔡約翰有「戰利品」同「魚躍鳥飛」在陣，基本上已經手執半邊盃耳，不過睇真啲形勢又唔係咁一面倒喎！小方向來最厲害嘅本領，就係唔聲唔聲嚇你一驚，搏起馬上嚟，從來都唔使睇牌面。就睇番呢個幾月賽事，「雲呢拿」同「會心微笑」爆大冷勝出固然令人目瞪口呆，就算數近啲睇睇剛周二，又有邊個會估到最有威脅嗰匹，竟然係之前田草11戰盲門嘅「自由式」呢？
       
拍住上望齊加冕

方嘉柏曾經喺2010年一次谷中賽事勁執6W，賽後自然意氣風發，仲即席喺沙圈跳咗part勁舞慶祝，成為一時佳話。當日小方同柏寶齊上齊落，今日馬房嘅首席殺手已經換上潘頓，論氣勢同殺傷力，新搭檔似乎比起舊組合猶有過之；今期小方兩匹餐士馬「控制者」同「準備就緒」都會交由潘頓操刀，又睇睇呢位當時得令嘅新任冠軍騎師，可唔可以喺加冕之日，同方嘉柏攜手衝線，齊齊榮登王座？