奧斯卡克敵英雄

猪拉多纳

莫連奴調教下突飛猛進

萬眾矚目嘅世界盃Opening Game終於順利喺聖保羅開幕，Peter睇到草地好靚，球場亦OK，所以話我哋能力控制唔到嘅嘢，就留待對方去解決，大家專心享受賽事就足夠。

揭幕戰巴西對克羅地亞，「森巴軍團」開賽初段踢得比較拘謹。相反克軍踢嚟虎虎生威，利用球場闊度打快速反擊，其中老將奧歷喺邊線頻頻沉底，搞到堤亞高施華成日畀對手引咗去右邊，中間得番大衞雷斯同要包入中間幫手嘅馬些路，結果就係馬些路擺烏龍令巴西落後。
尼馬夠班孭起10號

巴西今場落後下能夠反勝，全靠奧斯卡杜斯山度士喺中場搶波之後交畀尼馬，後者射入靚波追平。不過「森巴軍團」下半場又變得好拘謹，但奧斯卡杜斯山度士喺呢個時間又傳個靚波畀費特，後者喺禁區內同對手互有動作下倒地疑似「插水」獲得12碼，造就尼馬梅開二度反先。Peter覺得尼馬喺國家隊真係踢得好過喺巴塞好多，唔知係咪因為喺球會要同美斯夾；而球證嘅判決永遠成為焦點，不過呢啲都已成過去。

Peter覺得更有料嘅係車路士主帥莫連奴，佢今季放棄桑馬達而重用奧斯卡杜斯山度士確好嘢，因後者做到喺中場搶波然後策動反擊。奧斯卡「篤波」射入嘅「燕梳球」亦妙到毫巔，Peter睇到奧斯卡呢腳，可以肯定佢除咗天分外亦落咗唔少苦功，所以Peter認為今場焦點唔係球證西川雄一，應該係奧斯卡杜斯山度士嘅ＭＶＰ表現。