王子考牌戰 西班牙發維

猪拉多纳

世盃名單聽日公布

「王子」搶搭世盃尾班車睇今鋪！世盃衞冕球隊西班牙今晚出擊，喺塞維利亞同玻利維亞合演熱身賽，雖然「鬥牛兵團」今仗冇「馬德里雙雄」國腳，不過以費蘭度托利斯為首嘅邊緣「鬥牛兵」，為搶搭決賽周尾班車肯定會加多兩錢肉緊，喺呢場「終極考牌戰」Show Quali，對住魚腩玻利維亞有殺冇賠，「-2」照捧1.97倍「讓主」。

（now632台周六凌晨4:00直播）
國家隊軍醫：「迪哥」傷勢樂觀

呢排大家最關心嘅西班牙新聞，一定係迪亞高哥斯達嘅傷勢，《阿斯報》前晚話，國家隊軍醫施拉達已經將首份「迪哥」醫療報告交畀領隊迪保斯基，據講施拉達對哥斯達出戰世盃嘅機會都幾樂觀。點都好，「迪哥」有冇得去巴西仲係未知之數，但一班邊緣人有冇份踢世界盃，今晚對完玻利維亞就有結果！

迪保斯基會喺聽日公布世盃最後23人名單，亦即係話今仗係「終極考牌戰」，有份入選30人初選名單嘅8位皇馬同馬體會國腳，今仗獲准休戰，預期曼聯門將迪基亞同畢爾包中場伊度拉斯比會為國家隊處子登場，曼聯翼鋒桑馬達同車路士前鋒「費托」兩位邊緣人都會擔正。當中時隔成年先再為「鬥牛兵」披甲嘅「費托」，近年表現插晒水，要鍊贏同樣為決賽周入場券而戰嘅韋拿同尼格度，今仗實會施展渾身解數取悅迪保斯基。
玻利維亞外圍賽16戰僅2勝

世界排名68位嘅玻利維亞，今晚去到「鬥牛兵團」地頭，梗係畀人睇淡啦，唔好講遠，齋睇佢哋喺世盃南美洲區外圍賽16戰只係贏得2場，就知呢班波係幾咁削。

最慘係佢哋件主力射手馬些路摩連奴，禮拜一先幫高士路踢完場巴甲，山長水遠由貝洛奧里藏特飛赴塞維利亞，舟車勞頓肯定攰爆，玻利維亞輸大鑊就梗，相信連蛋都未必破到。
Data King：玻利維亞年幾未贏過

‧西班牙近5場比賽全部開入球細。

‧玻利維亞最近一次贏波已經係上年2月嘅事。
乜都玩錦囊：後備兵砌盡博埋「主其他」

西班牙主帥迪保斯基話明今仗係邊緣人考牌戰，喺曼聯踢到曉飛嘅桑馬達極少為國家隊擔正，畢爾包新星伊度拉斯比，更加係首次為國家隊披甲，佢哋去巴西嘅機會相對較細，今晚一眾「鬥牛後備兵」難得有機會上陣，肯定砌到盡，甚至乎贏緊都九成唔會肯收手，「主其他」有7.5倍，細細哋博一博，無壞吖！