蘇保羅11月添喜訊

猪拉多纳

蘇保羅踏入十一月份攻勢凌厲，繼剛周三谷草起孖之後，緊接尋日沙田日賽繼續有頭馬進帳，雖然喺旗下第三場先有備受追捧嘅1.7倍大熱門「金碧陽光」三甲不入，但阿蘇隨後喺第四場瞬即以「喜寶龍威」補中，奪得今季沙田賽事的第一Ｗ，兩個賽日內已交出三場頭馬，氣勢如虹。
       
四班仲有得贏

夥拍「喜寶龍威」開齋贏馬嘅係準新郎哥潘頓，呢位澳洲當紅騎師眼見韋達逐步逼近，立即作出反擊贏馬，繼續響騎師榜帶頭。
       
喜寶龍威大外欄一衝過晒，蘇保羅（右）提早送禮畀潘頓，老友鬼鬼。

蘇保羅月尾將飛到澳洲出席潘頓婚禮，尋日就率先送上頭馬做結婚禮物，不過練者就話全靠潘頓發揮得宜，令到馬匹可以克服孭頂磅嘅難題，以凌厲衝刺後上贏馬，蘇保羅仲睇好「喜寶龍威」下仗升回四班大有機會再下一城。