紅魔唔想蘇亞雷斯踩場

猪拉多纳

23/02/2012


曼聯要阿積士制止蘇亞雷斯，唔畀佢去奧脫福搞事！「哨牙蘇」加盟利物浦前効力阿積士，據英國傳媒報道，有舊隊友送咗張波飛畀「哨牙蘇」，「阿蘇」有意親身到奧脫福睇波。「紅魔鬼」為怕發生不愉快事件，公開要求阿積士勸蘇亞雷斯唔好入場！


同前阿積士隊友關係佳


「哨牙蘇」同曼聯後衞艾拉早前發生種族歧視風波，蘇亞雷斯嘅「拒絕握手」事件更令紅軍同紅魔關係火上加油，蘇亞雷斯簡直就係曼迷公敵。如果今戰佢親臨奧脫福，必然引起現場球迷不滿，分分鐘發生衝突，故曼聯已要求阿積士叫該舊部唔好入場。




不過，阿積士就話，蘇亞雷斯同舊隊友嘅關係極之好，到現場力撐並無不妥，似乎唔願意同「紅魔鬼」合作，究竟「阿蘇」係咪真係現身，到時至清楚。