|
|
22/02/2012
文： 阿占
今晚續演歐聯16強首回合，小弟嘅重心推介，就係神奇球隊巴素利，可以喺主場頂得住拜仁！瑞士班霸巴素利喺分組賽踢走曼聯出線，又有「美斯」壓陣，實力唔講得笑；相反德甲嘅拜仁一向蠱蠱惑惑，歇冬後喺聯賽仲未贏過盤，作客威力又減半，唔慌係好「仁」，一於捧受讓嘅巴素利2.4倍「讓球主勝」啦！（有線61及201周四凌晨3:45直播）
呢場波嘅焦點人物，肯定係巴素利個進攻中場梳頓沙基利。呢位身材矮小但非常好波嘅超新星，早就被球評家認定前途無量，來季沙基利將會進身豪門，即係邊隊？咪就係今晚嘅對手拜仁囉！呢位「瑞士美斯」有以一敵眾嘅高超技術，賽前佢亦大派定心丸，話唔會因為對手係未來老細就放水，反而會騷啲「哥利」畀大家睇，拜仁條防線睇怕今晚都幾愁！
主場做低過紅魔
事實上，巴素利嘅戰術係以梳頓沙基利做核心，佢哋嘅主攻踢法非常煞食，阿歷山大費爾、法比安費爾同馬高史達拿3件殺手，個個都係硬淨射術好之輩，佢哋能夠喺歐聯分組賽作客奧脫福同曼聯踢成3:3、喺主場更加以2:1氣走「紅魔」，一次就話符碌啫，兩次唔係符碌喇啩！巴素利嘅實力其實係比大家想像中更強，唔好再睇小佢哋啦！
拜仁內訌小豬打柴
係！對家拜仁慕尼黑踢歐聯經驗真係好豐富，但正正係佢哋熟晒歐聯踢法，明知作客和波都冇問題，只要返主場全力爭勝就掂，所以今晚好大機會以穩守為先，未必一定開W。而且「小豬」舒韋恩史迪加有傷唔出得，早前又傳出洛賓因為太過獨食畀隊友排斥，士氣唔慌好得去邊。即使唔講軍情，齋睇佢哋今季戰績，聯賽作客11戰5勝、歐聯分組賽作客3戰亦只係贏得1鋪，憑咩讓巴素利先？
|
|
金睛卡
发表于 2012-2-22 11:15
变色卡
显身卡