諾域治「+1」團年飯加餸

猪拉多纳

21/01/2012
文： 樂比堅尼

今日年廿八有好節目，英超早場諾域治主場鬥車仔，大家可以邊食團年飯邊睇好波！由「英國方太」達莉雅做班主嘅諾域治，今季表現令人驚喜，踏入2012年更創下三連勝，對住今非昔比嘅「錢七」車路士，諾域治受讓點可以唔捧，樂比仔撐「讓球主勝」，等「英國方太」幫大家「加餸」！




（有線300及200台周六晚8時45分直播）




「金絲雀」諾域治今季陣容並唔豪華，季初更被視為降班熱門之一，但踢落表現卻相當好，目前排英超第九位，係成績最好嘅升班馬，只要保持水準，相信要保留一席英超席位並唔困難。


金絲雀戰意加零一


諾域治成功之處係佢哋態度良好，即使自知技不如人都唔會放棄，所以佢哋今季聯賽甚少大敗，僅一場賽事輸多過兩粒，呢份鬥志同決心好值得讚揚。事實上，諾域治入球能力頗具效率，前線嘅史提芬摩利臣同埋格蘭荷特入球能力甚強，球隊今季聯賽合共射入三十二球，入球量僅次於五強車路士、曼聯、曼城、阿仙奴同埋熱刺！


車路士焗用費托掛帥


車路士近期表現好似有起色，聯賽同盃賽合共連贏三場，但對手並唔太強，而且贏得亦唔算清脆，由於杜奧巴要出戰非洲國家盃，前線被迫要搵費蘭度托利斯掛帥，「王子」聯賽已接近四個月冇入過波，咁嘅狀態實在好難幫車仔贏到波！




睇番車路士作客嘅表現，近九場贏得三場咁大把，對住韋根、亨克、昆士柏流浪等實力平庸嘅球隊都贏唔到，今場失分真係一啲都唔奇！