勝利阿聯合演入球騷

猪拉多纳

13/01/2012
文： KIT

今日晏晝有場澳職獨腳戲，由墨爾本勝利主場鬥阿德萊德聯。往績上「勝利」雖佔優，仲曾經誇到連贏10次，但「阿聯」去年已成功打破不勝宿命，加上「勝利」剛易帥，呢場小妹都唔敢亂撐「勝利」W，寧玩1.75倍入球大。（有線64及204周五下午5:00直播）




「阿聯」自從由看守教練高斯米拿接手後，踢咗4場錄得2勝2和，連搶8分後已經逼近頭6位，季後賽希望重燃！更重要係班波唔怕踢逆境波，好似上輪對住「獅吼」喺全場劣勢下仍然頂得住，去到尾段仲逼和對手搶得1分添！當中射手沙治奧雲迪克仲連續兩場有波入，信心返晒嚟，加上維度錫、藍斯同迪捷達腳風唔曳，前線火力絕對嚇得吓人。


首要任務令基維爾重拾自信


另邊廂嘅「勝利」，有新帥麥基頓正式履新，呢位曾効力葉士域治嘅左閘踢波時表現唔差，唔知教波又掂唔掂呢？麥基頓上任後首要任務，就係要協助加盟後一直表現患得患失嘅基維爾盡快入局。雖然呢位澳洲國腳近況已有好轉，但若果麥帥喺戰術安排上可再配合一下，將基維爾嘅作用發揮到最大，自不然可以帶動班波嘅表現。




鑑於麥基頓對班球員仍處於摸索階段，加上門將華拉菲養傷，中堅利查又未知踢唔踢得番，條防線始終有隱憂，撐「勝利」贏波似乎有啲冒險，倒不如跟數據玩大仲划算，始終「勝利」近8場波，有6度上演入球騷嘛！