西布朗平手盤嗒糖

猪拉多纳

01/01/2012
文： Mic少

今晚英超早場，西布朗主場對「拖肥糖」愛華頓，西布朗近半個月踢出今季代表作，早前不但連贏兩場，上仗更同億萬大軍曼城打成平手，狀態弗到爆。呢類中小型球隊往往靠打道氣，依家成功谷起士氣，仲可以威多一排，尤其係對手只係死火嘅愛華頓，西布朗勝算更高，平手盤必捧主隊。




（有線300及200台周日晚8時30分直播）




西布朗喺名帥鶴臣帶領下好識揀波踢，對住曼聯、車路士、熱刺、利物浦及阿仙奴唔勉強搶分，不過遇上中下游球隊往往有佳作。去年踏入十二月中後，西布朗先後作客擊敗布力般流浪同紐卡素，上仗返回主場竟然可以守和火力最強嘅曼城○比○，令好多球迷大跌眼鏡，亦證明西布朗現時狀態處於巔峰，就算遇到勁旅都未驚過，更何況今場對手只係跌晒Watt嘅愛華頓。


愛華頓前鋒啞火


愛華頓最大死穴係入球能力低，十七場聯賽僅得十八球進帳，仲少過兩支護級球隊布力般及保頓。「拖肥糖」咁少入球主因係兩位進攻主將沙夏同卡希爾狀態持續低迷，尤其係身為球隊上季聯賽首席射手嘅卡希爾，今季仲未開齋，對愛華頓打擊極大。「拖肥糖」唔識入波欠贏波本錢，平手盤要西布朗相當穩陣。