森林無錢班救兵撐卡城

猪拉多纳

31/12/2011
文： 翁文成

曾貴為前歐冠（歐聯前身）盟主，諾定咸森林家陣風光不再，今季深陷英冠降班區域之餘，最近仲連續6場聯賽食白果，咁好路唔踩多腳點得？今晚佢哋主場對卡迪夫城，平手盤捧「藍鳥」可謂坐和望贏。（開賽時間：周六晚11:00）


連續6場食白果


森林家陣排英冠尾三，成績差成咁皆因以托基同布力史托為首嘅鋒線做唔到嘢，竟然連續6仗食白果。有頭髮邊個想做瘌痢吖，領隊哥達維都想搵救兵幫手，弊在球會財赤，佢老人家要買人就要先放人，據講會方焗住要賣成隊波最踢得嗰件右閘基斯根達套現，情況真係灰爆。




哥達維限米煮限飯，日前宣布免費簽入喺聖誕前離開廣州富力嘅希活，呢位仁兄當打嗰陣都唔多掂啦，哥達維唔係咁天真以為32歲嘅希活幫到手啩？




對家卡迪夫城近況都唔好得去邊，不過會方勝在有水，領隊麥基講明1月會增兵，守將端納擔心正選位置不保，賽前已經呼籲班手足加多兩錢肉緊做番齣好戲，造訪有祖爾連治、韋斯摩根、拿修斯同莫隆尼4位後衞打柴嘅森林，平手盤捧得過吖！


森林連食6鋪白果


日期 戰果




11/12/26 主負彼德堡0:1

11/12/17 客和布里斯托城0:0

11/12/10 主負水晶宮0:1

日期 戰果

11/12/03 客負白禮頓0:1

11/11/30 主負列斯聯0:4

11/11/26 客負卡迪夫城0:1