櫻花士氣曳撐FC東京

猪拉多纳

29/12/2011
文： 走肖

天皇盃4強係今日足智彩重頭戲，大阪櫻花喺大阪長居陸上競技場對FC東京，讓平半要唔過，因為櫻花教練古爾比同中場路爾斯馬天尼斯喺日職收咧後決定離隊，軍心嚴重受挫，相反東京贏到順晒，仲喺官網嗌球迷買定決賽波飛，信心大過天抵捧。（now711台及有線148周四中午12:00直播）


外援馬天尼斯返咗巴西


由於要兼顧亞冠盃，高層又唔肯使大錢擴軍，今季櫻花聯賽排名下跌到第12位，搞到教練古爾比無癮決定喺天皇盃後走人。最慘係中場路爾斯馬天尼斯喺聯賽收咧後就返咗巴西搵班落，呢場依然唔使預佢，兩大支柱嗌走點似威得出？淨係睇櫻花連續兩圈都只係以互射12碼淘汰對手，就知唔多掂。




另一方面，東京奪得日乙冠軍重返日職後，對上兩圈先後打沉水戶蜀葵同浦和紅鑽，狀態依然對辦，雖然東京嘅教頭大熊清決定功成身退唔續約，後防主力今野泰幸又可能轉投大阪飛腳，不過佢哋對離隊傳聞處理得好低調，今野泰幸仲話唔想多講，要為東京捧走天皇盃冠軍至算，睇落唔覺士氣有問題。


信心爆棚叫Fans早買決賽飛


事實上，東京近9場只係輸過1場，開季後加盟嘅巴西殺手盧卡斯施維連奴弗到漏，加上柏雷素爾以日乙冠軍身份喺日職封王，依家東瀛傳媒都希望，東京可以創造另一個奇迹，撞啱天皇盃決賽喺國立競技場舉行，等於東京半個主場，賽前佢哋喺官網提醒球迷提早買決賽波飛，信心咁強唔捧點得？