尹戈爾「買一口」博中 贏波抵你做英雄

猪拉多纳

「哎呀呀呀呀……我估不到！」劉美君呢首經典金曲嘅歌詞，正正係我嘅心聲！尹戈爾居然諗到專登換龍門嚟守12碼，今次畀佢博到兼晉級，個個梗係當佢神咁拜啦！我欣賞尹戈爾夠大膽勇於嘗試，但佢嘅決定係咪最好呢？我就有啲保留喇！

告魯爾早早喺場邊熱身，但到加時下半場補時1分鐘先換佢入嚟，點解唔早啲換人等呢位門神可以適應吓比賽氣氛先？睇番統計數據，告魯爾歷嚟20次救12碼只救出2次，成功撲救率得10%，表現遠遠唔及隊友禾姆嘅27.3%（11次救3球），咁點解係換告魯爾而唔係禾姆呢？尹戈爾賽後解釋話係貪1米93嘅告魯爾身高手長，最終呢位門將亦不負所託，呢一鋪算係畀尹戈爾博中咗，又抵佢牙擦嘅！
調動毀譽參半 防線難頂阿根廷

不過，睇番今屆荷蘭踢咗5場波，尹戈爾嘅調動毀譽參半，分組賽兩度放迪比落場都有波入，16強撼墨西哥雖然係遲咗換亨特拉爾入嚟，但都憑佢一助攻一入波反勝。不過重用蘭斯、華希亞治同韋拿杜姆就惹嚟唔少抨擊，同時以名不見經傳嘅施利臣擔正把關亦令人費解，以咁嘅勢想問鼎世盃冠軍，相信難過登天。

另邊廂哥斯達黎加門將基羅拿華斯就慘情咯！佢雖然喺16強淘汰希臘時單手擋出基卡斯嘅極刑成為英雄，可惜今場面對尹佩斯、洛賓、史奈達同古積特呢啲有質素嘅12碼就畀人射穿晒，就算連續兩場當選最佳球員，亦難以彌補出局傷痛。荷蘭雖然搭上4強尾班車，但後防弱不禁風錯漏百出，究竟有乜辦法擋住以美斯為首嘅阿根廷呢？尹戈爾，我真係估不到咯！