撞啱蔡明紹養傷 吳嘉晉復出有運行

猪拉多纳

　　吳嘉晉停賽期滿復出，撞啱師兄蔡明紹仲喺養傷期，注定佢有運，因為如此一來，師父告東尼就可以順理成章咁畀多啲餐士馬佢搏，唔使驚紹仔呷醋。數一數，佢今日有6匹馬係來自東廐，係近月以來單次賽事騎得最多東廐馬，冇理由冇關照啩。

　　追溯對上1匹晉仔頭馬，已經係四月初「幸福指數」，接近兩個月冇馬贏，期間上名次數都唔係多，久唔久先至跑個第三，真係口糠糠，呢期更撞正師父爭冠軍，作為徒弟點都應該出番一分力，今日咁多馬跑，希望佢畀心機，唔好浪費咗呢個機會。

　　聰明波慢放帶到

　　論馬「聰明波」、「奀皮仔」、「超綵」都係有根有據，當然啦，後兩駒在三班冇咩特別，隻可以講話係路程啱、輕磅好跑，博博嚇嗰種。但係「聰明波」就唔同，上場跑得特別差，主要係泥地性能唔掂，之前幾場其實跑得唔錯，冇邊場輸得遠，而第七場出馬唔滿額，又缺少放頭馬，擺個晉仔上去，一定早走早着，慢慢放，控製到整場大局嘅話，帶到有咩咁奇。