場場有馬唔係講玩 方嘉柏繼續開火

猪拉多纳

　　幾期之前曾經寫過方嘉柏，大意係指佢坐言起行，有機會爭練馬師冠軍，隔三兩個禮拜，望一望現時練馬師掛名榜，原來佢已經拍住大摩，目前贏46場頭馬，一直窮追蔡神仙不捨。

　　係人都知谷草係方仔主場，佢到季尾亦都唔客氣，不停在谷草開火，得閒贏一兩場，久不久連中三元，而查番最近谷草賽果，原來佢在谷草已連贏9期，嘩！不愧為谷草霸王。

　　重用愛將潘頓

　　好，呢期夜賽方仔睇落又似料，場場有馬跑，8場共出9駒，一睇佢咁馬，就知唔係同你講玩，當中有5駒配上愛將潘頓，睇埋配搭，更加覺得呢晚係佢big day。

　　第四場「準備就緒」及第五場「紅簿仔」，都係贏完，再對準贏馬路程，擺明會繼續搏，唔使懷疑鬥志；第七場「自由式」，連場受制於人，總係交代唔到，但亦都因為咁，必會趁勇求勝；第八場「威威具星」，上場重現走勢，期望持續有進步。