真诚真意三班够争

猪拉多纳

　　第六场三班1000米。「四季星」初出田草直路赛，以放头跑法赢「飞哥」，翌仗负132磅转战此程排12档（赛前冇试过谷闸），前中段好似无人驾驶，韦达任由此驹自己在最外叠中间位置跟跑，过程中仲要有窒步、转弯唔顺嘅问题，当兜完大弯入正直路，韦达是但打了三两鞭，隻马成支火箭咁标上嚟过晒对手（首两段步速唔算快），表现岂只比对手超出一个班次？！超级马升上三班，负磅又减埋，优势犹在。除非赢完两场，体力耗尽，如果唔係，边会有对手有本事作出威胁。

　　第七场三班1200米。「真诚真意」唔係单单赚了慢步速，先至赢到上场四班同程，要知道，佢在首两段跟得前，係有赚，但跑法略比惯常进取，未必係最啱，而佢末段可以造出22.7秒，将整体时间扯番快好多（衝至最後200米奠胜），绝对係高难度动作。

　　今仗唔係冇对手，至少要应付两匹极準路程专家「强风骏马」和「劲卒过河」，谂深一层，前驹渐有加程迫切性，後驹重磅未必让得起，变相减轻「真诚真意」升班承受嘅压力，从而增强威力。