吳嘉晉外借心中有勁

猪拉多纳

葉廐見習生吳嘉晉雖然一向唔愁外借機會，不過到尋日先至靠伍碧權隻「心中有勁」，為佢帶嚟今季首匹外線頭馬，而呢系馬呢季一直都搵佢擔大旗，啱啱響夜賽「心中有程」快放帶唔到，但好快就憑呢隻「心中有勁」補番數。馬主胡百滔賽後就話，名下一對馬都鍾意孭輕磅，所以Peter今季就建議搵牌仔幫手，而吳嘉晉嘅表現就相當稱職，呢場能夠一放到底險勝「上浦駿將」，減七磅嘅威力係主要原因，加上呢匹馬響開鑼賽跑完之後，一直抖到依家先跑，盡收以逸待勞之利，無疑下次升番四班就會有啲吃力，但能夠一嘗頭馬滋味，胡百滔話絕對係一件開心事。
       
心中有勁排1檔一放到底，力抗上浦駿將之挑戰。
開心駕到飲恨未能起孖

此外，吳嘉晉第二場策騎師傅葉楚航隻「開心駕到」有心博冷，全程守好位之下，最終被杜利萊策騎「敏歡騰」以馬頸位所擒，未能完成今季首度起孖任務。