超群名驹有得追

猪拉多纳

　　第六场三班1650米。「超群名驹」前仗展现出少见咁强嘅後劲（今季12场之中最快），虽然整体时间唔快，末段冚过「好胜煌」、「进取」嘅姿态唔係吃力，而单计末段缔速，可媲美当日两场级际赛部分赛驹，唔觉係一般三班头马。

　　上赛转到此程，入到直路前面一道墙堵住，又置身於迫迫夹夹状态，根本无从发挥。今仗再跑此程而唔等周日1600米，唔知係咪让路性质（廐侣「闪烁武士」报跑该组），但唔想谂得负面。如果前仗唔係跑尽咗，今仗交得到那段後劲的话，在步速慢场合，直路抄出外叠衝，有条件衝赢对手。

　　第七场三班1200米。「尊胜福星」经过上场验證，除了唔夹韦达之外，隻马喺谷草跑，会係愈放愈开心！所以，今仗9档唔怕，只怕早段唔努力摆前，好在骑师係劳爱德，少一瓣担心。加多9磅迎战，睇唔到会构成巨大阻力，如非沿路被顶出四、五叠或敌意烧乾，有望带返。