必胜熊 加程有利

猪拉多纳

　　天文台话今日中午之前可能有雨，夜晚场地唔知变成点？！天气有时真係冇得估，好似上周末，隔晚以为实跑变化地，点知赛日跑跑吓转埋好地，服未！所以，临场真係要转数快，一见势色唔对路，之前「刨」过幾多都好，即刻要反转晒重整策略，如果唔係只会束手就缚。

　　第三场第四班1200米。「必胜熊」之前跑到左闪右闪，3岁仔未成熟冇法子，不过，睇佢跑幾场，但那段後劲其实幾强 ！ 今场转战此程，既然之前更加唔成熟之时，在谷草1000米已经识得追，隔多3个幾月，如果进度稍为改进，而1档及加程有利发挥的话，争胜机会唔係冇。

　　第五场第四班1200米。「永顺益」隔晚得两倍，值博与否 ？ 阿栋觉得隻马咁準，热啲都冇得避，鬼叫近绩正！今场仲畀埋个2档佢，唔热先至奇。由於排到内档关係，柏宝发挥上唔使再投鼠忌器，锺意跟前啲又得，留在中间又得，何况，呢场对手唔多叻，所遇阻力有限，有力取季内第2W。

　　小宇宙够快

　　第八场第三班1200米。「小宇宙」转到谷草发展，可能係迁就分区关係，因目前83分，上二班跑未必够撼，不如转到谷草试试，执得一场得一场，有便宜唔使洗颈嘛。至於7档起步，真係有辣有唔辣，内侧唔係冇快马，好在佢速度亦够快，只要上山落坡性能唔差，一放到底可预期。

资深评马人 陈华栋