路路好安告又有火花

猪拉多纳

安國倫榮升做爸爸之後，手風大旺，踏入四月份，除咗復活節賽日之外，其餘四次賽事都有頭馬進帳，尋日一開場即憑告達理馬房嘅「路路好」先拔頭籌，季內個人頭馬數字增至23場，佢囡囡果真腳頭好！
       
路路好（右）一放到底，成功打開勝門。

告達理自從遠征杜拜回來，攻勢一浪接一浪，繼上個禮拜與安國倫攜手以「鵬力洋洋」捧盃之後，尋日又同騎者合作贏馬。唔單止安國倫，大告近期同一班潮州鄉眾亦頻頻擦出火花，旗下由新潮人團體擁有嘅「綠豆爽」，出道三戰全上名，尋日則替較為年長一輩嘅潮州韓江團體名下馬「路路好」，贏得在港首場頭馬。據馬主團體經理人賽後表示，「路路好」天賦前速，特別啱跑一千米直路賽，而尋日偏軟場地對爭勝有幫助，呢匹三歲馬現時仍年輕，開竅後有力繼續反彈。