踏入三月未尝空手回 蔡约翰杀得性起

猪拉多纳

　　蔡约翰马房目前赢了53场头马，早前更凭「阳明飞飞」赢得个人在港首个打吡冠军，气势如虹是也！而踏入3月，一共举行了6期赛事，未有一个赛期空手而回，总共擸了10W。

　　检阅今期蔡廐兵力，除了用强盛来形容，都搵唔到第二个更合适形容词。唔係笔者过分乐观，或者一厢情願咁谂，10匹上阵马之中，冇机会入围或不多於3驹，而赢得嘅就唔只得3匹咁少，又睇睇佢有冇机会继3月10日後，再次在田草赛事演帽子戏法。

　　两匹不明物体「名利双收」和「无惧风雨」，未出赛已经热到辣手！係咪一出即胜一族就唔知，至少票数对晒办。此外，「下半场」阿蔡有3匹新胜马再出，又係配合而来。此为「多利皇」、「育成王子」及「山顶」，全部冇转路程，跑番啱啱赢马途程，摆到明想再争。

　　先讲「多利皇」，虽然冇点关照过吴嘉晋，赢完减十磅，即係赚凸，又有好档，话唔定二人有零的突破。至於「育成王子」和「山顶」，叻成点！从赛绩已经睇到晒，唔使我多讲，呢类3岁早上位嘅蔡廐马，有时赢到你唔信。