同感20→8.9倍啡格得手

猪拉多纳

大董周永健名下「感」系馬匹已經有一段時間無拉過頭馬，昨午卒之輪到佢隻「同感」贏馬開齋。「同感」閘前票如雨下，獨贏賠率由20倍着啡格打到落8.9倍贏馬，不過周生話賽前唔係太大信心，自己都只係中些少例飛，真係佩服啲落飛黨眼光咁獨到。
  
同感


狂勇咬甩馬伕耳仔


講番隻「同感」，唔知係咪狀態勁勇好火得滯，早兩日喺馬房咬甩咗馬伕隻耳仔，最終仲搞到要入醫院添，希望嗰位馬伕今次可以中番啲，彌補下心靈同肉體上嘅創傷啦！「同感」季初入Q之後有啲回落，不過最近狀態已經返晒嚟，上次馬偉昌騎完都話排檔太差至會輸。幕後話今次贏馬開竅之後，希望可以繼續保持水準，殺上更高班次。