老費派嫩口防線累死上盤客！

猪拉多纳

25/02/2012


老費派嫩口防線累死上盤客！曼聯於歐霸盃三十二強次回合主場對阿積士輸一比二，兩回合合計險勝三比二晉級16強，主帥費格遜賽後承認排陣失當，指後防五子太年輕輸經驗，仲有膊頭表明願意負擔責任，係咪會回水畀班上盤客先？




曼聯主場對阿積士開波前讓球半，主帥費格遜派出童子軍防線，由迪基亞把關，達施華兄弟踢兩閘，基斯史摩寧及菲爾鍾斯扼守中路，最年長嗰個基斯史摩寧都係89年出世，仲搵南韓球星朴智星做隊長。「紅魔鬼」憑射手查維亞靴南迪斯先開紀錄，但被奧比利斯及艾達韋列特兩度攻破大門反輸一比二，1.29倍熱Ｗ倒灶，上盤客損手爛腳。




除咗「紅魔鬼」外，多支熱門球隊都累街坊，史浩克04九十分鐘內同柏辛域陀尼亞各一言和，雙方兩回合踢成二比二，史浩克加時再入兩粒贏波，晉級都唔益人。




另外，畢爾包、華倫西亞及士砵亭等球隊同樣贏波輸盤，最終都能殺入16強。