日本「FK解禁」冰島

猪拉多纳

24/02/2012
文： 朱楓

日本今晚喺熱身賽主場對冰島，雖然冇徵召任何歐洲外流球員歸隊，但其實佢哋啲邊緣國腳質素勁高，爭位踢更加易有表現，加上「司令塔」遠藤保仁呢場擔大旗，講明要「FK解禁」用罰球打沉對手，對家冰島以雜牌軍Hea踢唔似頂得住，熱捧1.67倍「讓球主勝」有着數。（開賽時間：周五晚6:20）


邊緣國腳搏命爭表現


比賽喺大阪舉行，由於日本前鋒本田圭佑、中場香川真司同隊長長谷部誠全部冇被徵召，作為「主人家」嘅大阪飛腳球星遠藤保仁，賽前自發加操狂練罰球，仲話自己好耐未試過用必殺技罰球入波，暗示要搵冰島「試刀」，守住自己嘅國家隊正選位置，佢肯搏日本勝算大好多。




仲有呀，今次日本大軍名單當中，柏雷素爾射手田中順也未曾代表過國家隊上陣，而且神戶勝利船前鋒大久保嘉人同FC東京中場石川直宏難得被重召，有得落場肯定鍊盡。何況冰島嘅前鋒古莊臣、希古莊、後衞史甸臣同靴達臣全部冇隨隊，只係靠諾高平前鋒科華迪臣撐場，雜牌軍遊埠格慘敗唔出奇。