告達理巫斯義合作有火

猪拉多纳

雖然「爪皇豪火」唔夠分入選跑尋日嘅千八米一級賽香港經典盃，但台前幕後一樣全力為呢隻四歲馬爭分，卒之畀佢贏到一場三班同程賽事。
  
巫斯義贏爪皇豪火獲得一致掌聲。


兩年再聚一擊即中


賽前只係得73分嘅「爪皇豪火」，尋日搵到大師傅巫斯義幫手，擺明有心攻堅，結果呢個法國高手都冇令告達理失望，埋門頂實隻「同個世界」率先衝線，轉咗去告廐夾夾埋埋贏咗3W，省靚馬房招牌。值得一提，原來告達理已經兩年冇搵過巫斯義幫手，今鋪騎練再次合作即刻贏馬，認真巴閉。
  
告達理賽後大讚巫斯義發揮一流。




賽後大告都話楊明綸近幾仗嘅發揮都唔差，之不過「爪皇豪火」係一隻靠後勁食胡嘅馬，搵硬功大師傅騎嘅威力更大，所以先搵巫斯義，而今仗贏馬亦完全靠巫斯義嘅騎功搭夠。大告話知道「爪皇豪火」贏完今仗都未夠分，所以一定會盡力幫隻馬爭分入選。