小保加主勝響頭炮

猪拉多纳

10/02/2012


今晚阿甲秋季聯賽開咧戰，頭炮有2011/12年度春季冠軍小保加迎戰奧林普，小保加嘅奪冠功臣悉數留隊兼有2名歐洲回流兵加盟，實力有增無減，要砌低春季得尾二嘅奧林普相信唔係難事，一於用「主勝」響頭炮啦！（開賽時間：周六早上8:15）




列基美又同教練嗌交




施薩法斯安尼帶領嘅小保加，喺春季聯賽全季不敗奪冠，除咗一眾主力如施維坦歷治、韋亞迪等悉數留隊，更得歐洲回流兵坦基施華，以及回巢嘅柏保路列迪斯馬加盟，自然被看高一線。即使施薩法斯安尼講明嚟緊將會主攻南美自由盃，但開咧戰兵源充足，鬥春季榜尾分子奧林普又


點可以失威先？


雖然小保加中場列基美同施薩法斯安尼近日又開火互轟，不過早前受傷患困擾嘅列基美承認復出令佢相當高興，呢對冤家有望好似春季開咧前咁協議「停火」齊心打天下，對軍心影響不大。今仗對手奧林普春季全季僅得2勝，最近5戰更未嘗破蛋，雖然佢哋想向學生隊借用舊將迪亞高加雲救亡，不過呢位翼鋒右膝有傷，單嘢一直拖住，即使過到體測亦做唔到及時雨，中場馬田佩雷斯、後衞迪捷拉亦唔多妥，啞火嘅客軍今仗都係凶多吉少喇。