米堡傷3件新特蘭搶W

猪拉多纳

08/02/2012
文： 自由恒

隨住曼市雙雄先後喺英格蘭足總盃出局，中型班要挑戰呢項最老歷史盃賽並非絕無可能，特別係唔使踢歐洲賽嘅更值得優先留意，睇番未出局嘅球隊之中，最得閒、有實力而近況又好嘅，肯定非新特蘭莫屬，今晚「黑貓」喺第4圈重賽作客東北部宿敵米杜士堡，1.9倍客W值得捧場。（now671及672台周四凌晨3:45直播）


奧尼爾帶「黑貓」12戰8勝


新特蘭自奧尼爾掌帥後，12戰取得8勝2和2負，戰績唔差得過班霸級球隊，雖然射手賓特拿未出得，但冇咗「中堅賓」後反而因禍得福，事關傷愈嘅費沙甘保同埋新秀占士麥堅恩腳風更順，火力唔使擔心。


無疑米杜士堡喺個半星期前作客新特蘭都唔使輸，但近期卻行衰運多咗3件傷兵，先係首席射手史葛麥當奴要抖8個星期，上場對水晶宮一役，更有次席射手安尼斯及中場新星夏漢傷出。畢竟米堡今季首要目標都係重返英超，近期因為要兼顧盃賽，搞到聯賽已經6場不勝，跌到落英冠第6位，依家仲唔趁早喺盃賽斬纜仲等幾時。